السلام عليكم ورحمه الله وبركاته

 خبر مهم ورائع ومبشر جداً لراغبي زيارة الروضة النبوية الشريفة، اللي تابع منكم الفيديو بتاعي اللى كنت نزلته السنة اللي فاتت لما صدر قرار صادم بعدم دخول الروضة النبوية الشريفة إلا مرة واحدة فقط في السنة، وكنا كلنا يعني اخدين على خاطرنا من القرار ده لان كان مرة واحدة في السنة لا تكفي نهائى، خصوصاً لو حد مثلاً كان عمل عمرة وقعد 11 شهر أو سنة الا اسبوع وراح عمرة تانى مكاتش بيقدر يدخل الروضة النبوية وتكون فرقت معاه مثلاً على اسبوع واحد أو كام يوم. فكان الحقيقة الموضوع صعب أوى لأننا كلنا عارفين تكاليف العمرة بقت ازى دلوقتى خصوصاً لينا كمصريين، لكن وقتها قلنا يعني علشان خاطر ندي فرصة لباقي الناس اللى أول مرة تزور ولكبار السن …إلخ.

لكن الخبر الحلو هو ان تقرر إلغاء القرار القديم أو بمعنى أصح عمل تعديل عليه، بمعنى إنك لو أنت داخل المدينة المنورة أو بجوار المسجد النبوي الشريف بقى في عندك إمكانية من خلال برنامج نسك إن أنت تحجز دخول الروضة فى أى وقت حتى لو لم يمر سنة على آخر زيارة لك.

طيب ازاى؟؟؟

تقدر تحجز الموعد من داخل برنامج نسك، من خلال قسم جديد فى البرنامج اسمه “المسار الفوري”. وهتلاقى فى الفيديو التالى طريقة الحجز بالتفصيل، تقدر تشوف الفيديو وتتبع الخطوات اللى انا شارحها وهتحجز بنفسك الموعد المتاح فى الروضة من خلال “المسار الفوري” وتدخل الروضة حتى لو لم يمر عليك سنة من أخر زيارة لك للروضة إن شاء الله.

أهم حاجة تكون داخل المدينة المدينة المنورة أو بجوار المسجد النبوي الشريف وكل اللي عليك إنك طول ما أنت في المدينة تفتح برنامج نسك باستمرار وتضغط على رابط “المسار الفوري” وتشوف في مواعيد مفتوحة ولا لأ، وأول لما يفتح معاد .جديد تحجزه مباشرة

حقيقى تعديل رائع للقرار بنشكر عليه القائمين على إدارة المسجد النبوي الشريف وعلى القرار الجميل ده، جزاكم الله كل خير.

و رجاء لكل اللى رايح العمرة أو زيارة المدينة قريب لا تنسونا بدعوة حلوة هناك وسلموا لنا على الحبيب المصطفى صلى الله عليه وسلم