تحب تروح برج إيفل من غير ما تروح باريس؟ طب تعرف إن في نسخة تانية من برج إيفل موجودة في بلد تانية خالص غير فرنسا؟ أنا أحمد هاشم غاوي سفر، كمل المقال للآخر وأنت تعرف إيه الحكاية.

أيقونة باريس ونسختها التشيكية

طبعاً كلنا عارفين إن برج إيفل واللي بناه جوستاف إيفيل هو أيقونة مدينة باريس، عاصمة فرنسا. لكن مش كتير مننا يعرف إن في نسخة مصغرة من برج إيفل موجودة في دولة أوروبية تانية، وكمان اتبنى في نفس الوقت تقريباً.

البرج التاني ده اسمه “باترين تاور” أو برج باترين، وموجود في مدينة براغ الجميلة عاصمة جمهورية التشيك. البرج متسمي على اسم التل اللي اتبنى فوقيه واللي اسمه تل باترين، وهو واحد من أجمل تلال مدينة براغ. والحقيقة إن البرج مش مبنى عادي، ده برج حقيقي ومزار سياحي تاريخي شهير، ويعتبر من أهم مزارات مدينة براغ.

قصة بناء برج باترين

والحقيقة هو حكايته عجيبة شوية، يعني ابتدت لما اشتهر برج إيفل في فرنسا وبدأت الناس تزوره من جميع أنحاء العالم. وبعد سنتين من افتتاحه قرر مجموعة من وجهاء التشيك اللي كانوا وقتها عاملين نادي اسمه “نادي السياح التشيكي” إن هم يزوروا باريس ويشوفوا برج إيفل. وطبعاً انبهروا بشكل برج إيفل والموضوع سخن في دماغهم وقال لك ما تيجي نعمل واحد عندنا احنا كمان، هم يعني الفرنساويين أجدع مننا في إيه؟

وبالفعل أول لما رجعوا تشيك نشروا الفكرة وعملوا حملة تبرعات جامدة جداً ونجحوا في لم فلوس كتير لدرجة إنهم بنوا البرج في ست شهور بس.

مقارنة زمنية بين البرجين

يعني برج إيفل اتبنى في سنتين من 1887 واتفتح 1889. وبعدها بسنتين بالظبط، برج باترين ابتدأ العمل فيه في مارس 1891 وافتتحوه في نفس السنة بعد ست شهور بالظبط. يعني يعتبر من عمر برج إيفل، الفرق ما بينهم سنتين تقريباً.

لكن طبعاً لو فتحت الفيديو السابق وشفت شكله فواضح جداً ان البرج يعني يعتبر شبه برج إيفل لكن “على قد حاله” خالص بصراحة! ممكن الشكل يكون شبهه، ومبني برضه من الحديد زي برج إيفل، لكن طبعاً برج إيفل حاجة تانية خالص. برج إيفل ضخم وارتفاعه 330 متر، إنما برج باترين ارتفاعه حوالي 63 متر بس. وفي تقريباً 300 سلم تقدر تطلع السلالم لو أنت رياضي وتستمتع بالمنظر وأنت طالع على السلالم. ولو مش هتقدر، فالبرج فيه أسانسير تقدر تطلع بيه للقمة .

المنظر الخلاب من أعلى برج باترين

الحقيقة الفيو من فوق برج باترين جميل جداً بيكشف براغ كلها. مش عشان هو عالي، ده ارتفاعه زي ما قلنا 63 متر بس، لكن لأن تل باترين اللي مبني عليه البرج ارتفاعه حوالي 300 متر فده اللي مخلي الفيو من أعلى البرج رائع وكاشف معظم براغ.

وطبعاً استغلوا ارتفاعه ده كمحطة اتصالات في الحرب العالمية الثانية، وأعادوا ترميمه وافتتاحه مرة تانية سنة 1991.

تجربة الصعود إلى تل باترين

وأنت بتزور البرج، الحقيقة أنت مش هتستمتع بجمال البرج ولا الفيو من فوق بس، لكن كمان هتستمتع بـ تل باترين نفسه. ومعظم السياح اللي بيزوروا البرج بيحبوا إن هم يطلعوا ماشي للبرج من جوة التل. وهم عاملين ممرات وسلالم تطلعك لفوق وجنائن خضراء وأماكن للجلوس علشان اللي يحب يرتاح وهو طالع.

وطبعاً كل لما بتطلع لفوق بيبان أكثر معالم وجمال مدينة براغ من فوق. وللي ما يقدرش يمشي أو ما عندوش وقت إن هو يضيعه في المشي لحد فوق، فيقدر يطلع لقمة تل باترين عن طريق الفونيكلور أو الترام الجبلي. وده بيطلعه لحد فوق بنفس سعر تيكيت المواصلات العادية تقريباً. ولما بتطلع لفوق التل بتمشي دقيقتين أو ثلاثة لحد البرج.

هل برج باترين يستحق الزيارة؟

بالتأكيد أنصحك وأنت بتزور براغ إنك تزور تل باترين وتزور برج باترين، النسخة الثانية المصغرة من برج إيفل، لأن هم فعلاً يستحقوا الزيارة. ولو كنت زرت باريس قبل كده فأنت هتشوف الفرق ما بين الاثنين، ولو لسه ما زرتهاش يبقى أديك شفت “الكوبي” لحد ما تشوف “الأصل” إن شاء الله في باريس.

مَعالم براغ العجيبة الأخرى

لو حظك حلو وكان الجو صافي وقت زيارتك، هتقدر تشوف من فوق برج جيجكوف، ثاني أوحش برج في العالم، واللي برضه بقى من معالم مدينة براغ حالياً. اتكلمنا عن برج جيجكوف قبل كده في مقال سابق لو ما كنتش قريته أنصحك تقراه علشان تعرف إن الجماعة التشيك دول مش حارمينا من أي حاجة وعلى طول بيعملوا لنا حاجات عجيبة، سواء زمان لما بنوا “الميني برج إيفل” أو حديثاً لما بنوا برج جيجكوف ثانى أوحش برج فى العالم. ده غير كمان المبنى اللي بيرقص أو الـ “دانسينج هاوس” اللي هنبقى نتكلم عليه في مقال تانى إن شاء الله.

فتابعوا المدونة عشان توصلكم المقالات اللي جاية وما تنسوش تشوفوا المقالات اللي قبل كده وتعملوا طبعاً لايك وشير. دمتم مسافرين،